A Concellería de Servizos Sociais de Ribeira, ao abeiro da campaña Nadal Solidario, está a colaborar con distintas organizacións benéficas do termo municipal que contan con banco de alimentos ou iniciativa semellante, destinando unha partida de comestíbeis e doces propios desta época para que sexan entregados as familias usuarias.
Esta semana iniciouse o reparto destes produtos, dirixidos a un cento de familias residentes no municipio que se atopan en situación conxuntural de crise sobrevida, carecendo de recursos económicos suficientes e dos medios necesarios para facer fronte ás necesidades básicas. Esta acción é complementaria doutros recursos das administracións local e autonómica, que manteñen coordinación directa con estas organización para a derivación aos servizos públicos daquelas situación familiares ou persoais con necesidade de atención social.
A concelleira de Servizo Sociais, Ana Barreiro Rego, que colaborou na entrega, quixo agradecer publicamente “a mostra de solidariedade da sociedade ribeirense, que está a quedar patente nestes días con múltiples colaboracións con estas entidades para complementar a dotación dos Banco de Alimentos”. Tamén quixo manifestar a súa gratitude a todas estas entidades “polo labor desempeñado ao longo do ano e en especial nestas datas para que non falten agasallos e doces de Nadal nas mesas das familias mais vulnerábeis do noso concello”.
Esta acción é complementaria a outras actuacións realizadas dende ou Departamento Municipal de Servizos Sociais, dende o cal se vai facer entrega dun agasallo de Nadal aos nenos e nenas integrados en programas socioeducativos que o Concello imparte ao longo do ano.
