O Concello de Ribeira informou de que este luns 20 de decembro a empresa adxudicataria retomou as obras encamiñadas ao remate do Centro Social Multiusos de Carreira e a súa urbanización exterior: unha intervención que segundo lembra o Goberno local ficara paralizada de resultas do expediente contraditorio establecido entre a devandita empresa (Degalle Construcciones S.A) e a dirección de obra “por diferencias de criterio relacionadas coa climatización da instalación”, cuestión esta que “xa foi solucionada”, engade o Concello.
De xeito paralelo, o Executivo de Manuel Ruiz obtivo unha ampliación no prazo de execución da Deputación, posto que a obra está financiada no marco do Plan de Acción Social da institución provincial. “Froito destas negociacións o prazo de execución queda ampliado ata febreiro de 2022, fai saber o Concello, mostrando a súa confianza en que “este sexa o último dos atrancos experimentados por unha intervención arquitectónica que rexistrou numerosos imprevistos”. Neste punto, o Concello explica que as instalacións foron obxecto xa de “cuantiosos actos vandálicos provocaron a renuncia do anterior adxudicatario” e obrigaron ao Concello a modificar o contrato para incorporar as eivas ocasionadas e a impulsar un novo procedemento de contratación, co conseguinte adiamento.
O Goberno sinala que o proxecto técnico que se está terminando de executar (e que comporta un investimento de 260.082 euros, IVE incluído), inclúe o remate das instalacións, revestimentos interiores e exteriores e carpintería interior, así como a urbanización do entorno mediante a demolición de parte dos muros e escaleira existentes para a construción dunha nova escaleira que comunicará os dous niveis do espazo público. A infraestrutura, de 268 metros cadrados útiles de superficie, vai estar formada por dous volumes unidos, un dos cales consistirá nun local diáfano capaz de aloxar diferentes actividades da comunidade e o outro dará cabida a unha cafetería e aos servizos comúns.
