A Consellería do Mar, a través de Portos de Galicia, investiu 395.000 euros nunha actuación de mellora integral das instalacións flotantes do peirao do Freixo, no municipio coruñés de Outes. Así o confirmou na mañá deste 2 de decembro a presidenta do ente público, Susana Lenguas, nunha visita á dita contorna para comprobar o desenvolvemento dos traballos que se atopan en execución.
Lenguas explicou que Portos está a desenvolver unha actuación conxunta de construción, ampliación e mellora de peiraos flotantes en oito portos da provincia da Coruña. Estes peiraos son os do Freixo, Corme, Pontedeume, Fisterra, Muros, Miño, Betanzos e Corcubión e a obra conta cun orzamento total de 1,4 millóns de euros.
A presidenta de Portos lembrou que a semana pasada deron comezo as obras correspondentes ao porto do Freixo que consisten na renovación integral das ditas estruturas flotantes que dan servizo a máis de 350 embarcacións. Nelas procederase á renovación dos pavimentos con madeira tecnolóxica. Ademais, renovarase a rede de subministro de auga e electricidade, dotaranse de alumeado e instalarase un sistema de apertura de portas dos pantaláns a través do teléfono móbil.
Os traballos completaranse coa instalación de escadas abatíbeis de subida aos peiraos desde o mar; o balizamento dos extremos dos mesmos, así como o saneado de pilotes e limpeza de flotadores, entre outras reparacións puntuais. Finalmente, Portos de Galicia instalará un bolardo para impedir o paso de vehículos á pasarela de madeira.