O Concello de Noia vén de denunciar novas accións vandálicas contra os adobíos de Nadal que engalanan estes días as rúas e prazas da vila, accións que se engaden ás tristemente perpetradas nas datas previas festividades, que puxeron o foco nos adornos da Alameda e os dispostos polos comercios locais. Agora os vándalos cebáronse co engalanamento da praza do Tapal, máis concretamente cos elementos vexetais (romperon varias árbores, roubaron luces dos mesmos e mesmo levaron o alumeado das macetas que decoran a praza).
O Concello mostrouse especialmente crítico con estes comportamentos de “persoas incívicas que non saben convivir en sociedade”. O Goberno local engadiu que desta volta non se vai repoñer o material danado ou sustraído, co fin de evitar que se sigan esnaquizando as decoracións. E concluíu: “Seguimos insistindo e pedindo respecto para o que é de todos e todas, ao tempo que reiteramos a nosa petición de tolerancia cero con estes comportamentos e que, se alguén viu algo, o poña en coñecemento das autoridades”.
