Os vándalos cébanse cos adobíos urbanos de Nadal en Noia

O Concello de Noia compartiu nas redes as pegadas visíbeis dun novo caso de incivismo e vandalismo no termo municipal, desta volta co foco posto nos diferentes elementos dispostos polo Consistorio para celebrar estas datas en Nadal. Segundo fixo saber o Concello, ao longo desta semana que vimos de deixar atrás foron roubadas diversas luminarias das árbores do palco de Alameda así como outras luceciñas decorativas situadas en diversas zonas da contorna urbana.

Asemade, desapareceu un dos renos dos Xardíns Felipe De Castro e varias decoracións das tendas do Cantón sufriron diferentes destrozos. En concreto, nesta contorna os vándalos sacaron as luces das árbores e tentaron esnaquizar a caixa de agasallos que está situada nesa zona, conseguindo rebentar os parafusos e desfacer a composición de Nadal que acubillaba a caixa. O Concello, ante a gravidade destes feitos (que se repiten nos nosos municipios coa única variación dos elementos e equipamentos que son obxecto da destrución), fixo un chamamento o civismo e a responsabilidade e convidou á cidadanía a que siga tendo un comportamento exemplar con tolerancia cero respecto destes comportamentos.