O Concello de Boiro non quere deixar soas ás persoas maiores do municipio nestas datas sinaladas. Así, a través do Departamento de Servizos Sociais, mantense activo este Nadal un servizo de chamadas de acompañamento para as veciñas e veciños de máis de 75 anos. Esta iniciativa comezou no ano 2020 co obxectivo de facer un seguimento da situación destas persoas por mor da COVID-19.
Coa chegada deste Nadal o Concello quixo tomar a iniciativa de contacto telefónico cos boirenses que segundo o padrón municipal de habitantes constan como empadroados sós e son maiores de 75. O obxectivo principal desta iniciativa é coñecer o estado dos veciños e veciñas e achegarlles información das axudas das que poden dispoñer no caso de que as precisen, principalmente en materia social.
O concelleiro de Servizos Sociais, Raúl Treus, fixo fincapé na importancia de que unha iniciativa que naceu durante a pandemia se manteña anualmente xa que “nos permite coñecer o estado dos nosos maiores e seguir contribuíndo ao seu benestar social”.
