Este sábado 11 de decembro, ás 12.30 horas, a Sala Arcos Moldes do Auditorio de Rianxo acollerá o espectáculo Os apalpadoriños, de Nelson Quinteiro.
Trátase dunha cita festiva e cultural dirixida a crianzas e familias. Pódense reservar localidades a través da web concelloderianxo.gal/reservas. Esta proposta forma parte da programación de Rede Cultural da Deputación da Coruña.
Os apalpadoriños é “unha grande produción de danza, música e teatro” que conta cun sobranceiro elenco artístico formado por 11 artistas, entre músicos, actores, actrices e bailaríns entre os que se contan o acordeonista Álvaro Cardalda, o gaiteiro Iago Prieto, o percusionista e cantareiro Xan Pérez e o multiinstrumentista Nelson Quinteiro, amais dos bailaríns Iván Villar, Yohel Santos, María Cordeiro, Manu Albariñas, Laura Casas, o actor e clown Iván Davila, a actriz Adela Bértolo e a artista plástica Marta Quinteiro Villar.
En palabras do equipo responsábel do espectáculo, este achéganos a “un elenco multidisciplinar, de moitísimo talento e titulación e que de seguro fará as delicias do público infantil e que nestas festas levará a máis necesaria ca nunca ilusión do Nadal a prazas como Poio, Pontevedra, Rianxo, Salceda de Caselas, Touro, Valdoviño, á Cidade da Cultura de Galicia, Negreira e moitas máis nunha campaña de Nadal que se aveciña do máis completa e con máis de 30 representacións escénicas”.
