Ao proxecto Sana el hoy, programa educativo posto en marcha polo Concello de Padrón para promover unha alimentación e hábitos de nutrición saudábeis entre os nenos e nenas de 1º a 6º de Primaria do CEIP Flavia e no CEIP Rosalía de Castro, véñenlle de saír dous grandes apoios deportivos de alto nivel: por unha banda o Mombús Obradoiro de Santiago e, pola outra, o Rotogal Boiro Voleibol.
Eloy Figueira Rial, docente do programa Sana el Hoy, impartiu catro sesións sobre alimentación e movemento acompañado polos xogadores do Rotogal Boiro Voleibol José Carlos Romero e Renan Levandoski (no CEIP Rosalía de Castro) e dos xogadores Gaby del Carmen y Gaspar Bitar (no CEIP Flavia), así como polo adestrador Marcelo Benavídez. Nelas, explicaron os beneficios dunha correcta nutrición á hora de combater a obesidade infantil e a diabetes temperá.
Eloy Figueira explica que “o proxecto pretende inculcar entre os escolares e os seus pais a importancia das boas prácticas nutricionais para conseguir unha boa saúde. As actividades inclúen charlas e accións didácticas cuxo obxectivo é transmitir recomendacións e advertencias nutricionais que axudarán tanto ao alumnado como ás súas familias a vivir máis e mellor”. Neste sentido, a concelleira de Cultura, Lorena Couso, sinala que “en Padrón decidimos centrarnos no alumnado de primaria xa que nesa franxa de idade é na que resulta máis sinxelo crear uns hábitos que poidan implantarse e seguirse durante toda a vida”.
