O risco por desbordamentos na contorna das concas de Galicia-Costa obriga a activar o Plan Inungal da Xunta de Galicia

A Dirección Xeral de Emerxencias e Interior ven de activar o Plan Especial para risco de inundación en Galicia (INUNGAL), en situación de alerta, ante o posible desbordamento de varios ríos das concas Galicia-Costa.

Actualmente, os leitos que están baixo vixilancia son os do Xubia, en San Sadurniño; do Oitavén, en Soutomaior; do Verdugo, en Pontecaldelas; do Mera, en Ortigueira; e do Landro, en Viveiro. Segundo a información recibida mediante os sistemas de control e seguimento, ao superar os limiares establecidos, estes cursos están a presentar un crecemento significativos dos seus caudais, polo que poden chegar a darse enchentes puntuais.

De feito, o CIAE-112 Galicia tivo coñecemento, ao longo do día de hoxe, de incidencias nos concellos afectados polo Inungal, como é caso de Soutomaior, onde os membros da Agrupación de Voluntarios de Protección Civil efectuaron diversas saídas para controlar posibles inundacións no lugar de Comboa, así como retirar pedras e árbores que entorpecían a vía nas zonas próximas a Arcade ou Cortella. Outro caso foi o da localidade de Ortigueira, onde tamén se rexistraron chamadas ao 112 relativas a rúas alagadas en Miñeixa ou de incidencias de circulación, en San Xoán.

Así, desde o 112 Galicia, recórdase a necesidade de incrementar a precaución nas contornas e estradas próximas a pontes ou torrentes, xa que a suba repentina dos caudais pode xerar dificultades na circulación.