Estes venres 17 de decembro o escritor Michael Künstler e a súa muller Susana retomarán en Ribeira a presentación do documental baseado no libro autobiográfico Nunca sabes a dónde te lleva la vida. Farano ás 20:00 horas na Sala de Conferencias do Centro Cultural Lustres Rivas.
Trátase do documental Alquimia, cuando el dolor se convierte en arte, un proxecto das directoras Nuria Botet e Elisa Cuevas que naceu “para dar voz a persoas que tiveron un difícil pasado e que foron capaces de transformar a dor nunha experiencia creativa, compartíndoa cos demais”. Alquimia, segundo avanzan, “é unha verdadeira historia de superación que nos convida a reflexionar e a ser conscientes de como na vida unhas situacións poden levar a outras, de tal xeito que o noso mundo pode derrubarse coma as figuras dun dominó, sen que sexamos case conscientes diso”.
A vida de Michael Künstler
Michael Künstler é a súa vida son os eixes temáticos do documental, uns eixes que partindo do específico tocan de cheo cuestións universal. Fillo dun médico traumatólogo e dunha fiscal, Michael non atopou nos seus primeiros anos de vida nin o agarimo nin a familia que ansiaba. Na nenez e na adolescencia, os internados convertéronse no seu “fogar”. Logo, un desafortunado aborto truncou definitivamente os seus estudos de Medicina. Na lexión perde traxicamente ao seu gran amigo e un inesperado cancro de fase avanzada, ao que se enfronta con absoluta soidade, restaurou de xeito paradoxal a liberdade desexada por Michael, pero as drogas arrebatáronlla de novo levándoo ao abismo máis profundo, do que sae unha vez máis, “cunha forza inexplicábel”. A partir de aí, logo de sufrir un infarto e un derrame cerebral, comeza a percorrer as rúas de España, sen familia e sen fogar, onde é quen de descubrir o mellor e o peor do ser humano. Porén, mesmo nos peores momentos Michael fixo gala dunha férrea resistencia, e é este espírito loitador o que “fixo posíbel o que semellaba imposíbel”: escribir un libro e ser protagonista dun documental, amais de recuperar a felicidade da man de Susana, a súa muller.
