A sede do Conservatorio de Música Enrique Paisal, en Ribeira, vai dar cabida nos vindeiros días a catro concertos de Nadal, ofrecidos polo alumnado do Conservatorio Mayeusis de Pontevedra, da Aula Galega de Saxofón e do propio centro.
O director Álvaro López, o coordinador da Aula de Saxofón José Fungueiriño, a profesora Ana Galloso e a concelleira de Educación Juana Brión deron a coñecer esta programación.
Este venres ás 19 horas actuará unha representación do departamento de piano Conservatorio Mayeusis no marco dun acordo de intercambio co conservatorio ribeirense que levará a alumnado do centro a cidade pontevedresa na segunda avaliación. O concerto será emitido por streaming a través da conta de Youtube do Conservatorio.
Xa o martes 21 ás 18.30 horas desenvolverase un concerto polo alumnado do propio Conservatorio Enrique Paisal. Tamén será retransmitido por streaming.
En canto á Aula Galega de Saxofón, ofrecerá dúas actuacións o sábado 18 (20.15 horas) e o domingo 19 (18.30 horas), con participación do alumnado, xunto a Xabier Casal, o novo profesor titular da iniciativa, e a pianista Hilomi Sakaguchi.
Dende Cultura do Concello explican que dado o limitado do aforo en principio está reservado aos acompañantes dos intérpretes pero aquelas persoas que estean interesadas en asistir poden escribir á conta de correo electrónico secretario.conservatorio@ribeira.gal ou chamar ao 981 873 204 por se quedasen sitios libres.
