O programa de actividades desenvolvido polo Concello de Porto do Son para celebrar estes festas de Nadal inclúe diversas unha manchea de citas culturais e de lecer para a rapazada, como por exemplo a representación da adaptación musical e teatral de O libro da selva, escrita en 1894 polo escritor inglés Rudyard Kipling e levada despois ao cinema por Walt Disney. Será este mércores 22 de decembro, a cargo de Teatro Avento Producións, no auditorio da Casa da Cultura a partir das 17.00 horas e da man do Concello e a Deputación.
Tamén cómpre marcar no calendario os Obradoiros de Nadal que o Concello organizará na Ludoteca do Son e na Casa da Cultura de Xuño e Portosín, os días 22, 27, 28 e 30 de decembro, así como o 3 e o 4 de xaneiro, en horario de 17.00 a 19.00. A través destes obradoiros, a rapazada terá unha oportunidade para divertirse e facer voar o seu talento creativo ao mesmo tempo que se lles achega ás nais e aos pais unha proposta de conciliación para este tempo de celebracións.
Amais, os días 24 e 26 de decembro, entre as 18.00 horas e as 21.00 horas, visitarán a vila os compoñentes da Charanga Os Santiaguiños de Padrón, que percorrerán as rúas dando unha viraxe divertida, explosiva e charangueira aos éxitos musicais máis destacados do momento.
Os nenos tamén poderán gozar dos inchables de Tiko Doko, o vindeiro 29 de decembro, cuxas atraccións estarán no Polideportivo de Santa Irene de Porto do Son en horario de 17.00 a 21.00 horas.
Sen dúbida un dos momentos álxidos serán as visitas de Papá Noel e os Reis Magos, que percorrerán o municipio e visitarán á rapazada das parroquias. O día 23 será a quenda da ruta de Papá Noel, que comezará ás 10.00 horas e estenderase até as 20.00, cunha pausa para o xantar a partir das 14.00 horas (ata as 16.00). O día 5, o itinerario dos Reis Magos seguirá o mesmo traxecto polas parroquias. Podemos ver o itinerario nesta imaxe que incluímos a continuación.
Polo que se refire aos maiores do concello, está prevista unha xuntanza o día 26 de decembro no Club de Xubilados de Porto do Son, a partir das 18.00 horas. As inscricións están abertas para as persoas xubiladas do municipio na Área de Benestar até o 17 de decembro ou chamando ao 981 86 74 14, de 10.00 a 12.00 horas.
A maiores, o Concello organiza o 31 de decembro, na praza de España de Porto do Son, en horario de 18.00 a 21.00 horas, unha festa para recibir o novo ano (e despedir o vello) amenizada por DJ Cabina Móbil.
