O Cidade de Ribeira segue a ritmo de cruceiro na Primeira Autonómica. Esta xornada a súa vítima foi a SD Esclavitud que viña no seu mellor momento despois de vencer en Agolada e empatar na casa fronte ao Taragoña, pero non foi quen de rascar algo na súa visita ao fortín da Fieiteira.
O partido foi de claro dominio local, sobre todo nunha primeira parte na que marraron numerosas ocasións, na súa maioría con disparos lonxanos. Sen embargo foi Silva, dos de Padrón o que tivo a máis clara, cun remate de cabeza que se marchou á madeira da protería defendida de Flori. Co resultado inicial chegábase ao tempo de lecer.
Na segunda metade, unha xogada de Abi por banda serviu para qque este lle cedera o balón a Anthony que estaba coa caña lista para pescar o balón e mandalo á rede para poñer o definitivo 1-0. Nos último minutos os visitantes intentárono con balóns directos ao área, pero apenas inquietaron a portería do Cidade de Ribeira. Con est resultado os de Santa Uxía marchan líderes con 23 puntos, tres máis que o Flavia.
No outro partido da xornada, o Unión non foi capaz de gañar, e xa van cinco encontros sen sumar de 3, contra o Val do Ulla. Despois dunha primeira parte igualada, á volta dos vestiarios, Julio Souto adiantaba aos locais, e Ismael Cerqueiras no 70 salvaba un punto para os de Asados que sabe a pouco. Con este empate os de Luisito sitúanse sextos con 16 puntos.
No Grupo da Costa o Volantes de Baño conseguiu sumar contra o Soneira, un dos favoritos ao ascenso. E iso que a piques estivo de sumar de 3, cando no 67’ Alejandro González cazaba un balón para adiantar aos de Muros. Pero cando parecía que a vitoria quedaría na casa, un gol de Lema no 87’ condenaba ao Volantes. Con este resultado os de Iván González mantéñense oitavos con 7 puntos.
