O BNG de Ribeira vén de propor unha batería de actuacións para aumentar zonas verdes no concello de Ribeira, así como para “mellorar instalacións deportivas e reforzar a seguranza viaria”. Son, en total, 15 contribucións que chegan, en palabras dos nacionalistas, “ante a nula vontade de diálogo por parte do Goberno local para consensuar a que se deben destinar 1.065.994 euros que concederá a Deputación da Coruña para o Plan de Obras e Servizos de 2022”.
O concelleiro, Luís Pérez Barral, indicou que “o Bloque solicita que a escolla das actuacións nas que se investirán os cartos procedentes da Deputación conten co dialogo e consenso de todos os grupos que da Corporación. E engade: “A día de hoxe non se nos convocou a ningunha xuntanza para acordar nada, parece que PP-PSOE están cómodos co seu pacto e impedirán que as propostas doutros grupos poidan prosperar”.
As propostas aglutínanse en tres grandes bloques; aumento das zonas verdes, mellora dos espazos deportivos e reforzo da seguranza viaria nas parroquias. Para o voceiro do BNG, Xosé Vázquez Cobas, “incluímos actuacións que directamente nos pediron veciñas e veciños e necesidades importantes que cómpre atender”.
Con respecto ao aumento das zonas verdes propoñen implementar un plan, Reverdecer Ribeira, que se complemente co acondicionamento de dous parques infantís para dar acubillo ás familias cando chove, coa construción de dous aseos públicos en Ribeira e coa rehabilitación do Lavadoiro de Gude en Artes como espazo de ocio.
Con respecto á mellora das instalacións deportivas inclúen dotar de torres de iluminación o Campo de Fútbol de Carreira, construír novos vestiarios no de Oleiros, mellorar a zona do Campo da Tasca en Aguiño con novo mobiliario e adecuar os Campos de Samil en Corrubedo como espazo recreativo.
Por último, entre as propostas de reforzo da seguranza viaria destacan a renovación da rúa Sidreiras con novo firme e beirarrúas, iluminar e pavimentar os aparcadoiros disuasorios de Ribeira, ampliar e dotar de sumidoiros a rúa Revolta de Castiñeiras, equipar de beirarrúa e pavimentado a rúa Iñeiras en Olveira, pavimentar a estrada de Lixó a Balteiro en Oleiros e instalar marquesiñas no colexio de Frións en Carreira.
