Este domingo 26 celébrase en Rianxo o Concerto de Nadal da Banda da Escola de Música Municipal

O domingo 26 de decembro, ás 18.30 horas, celebrarase o Concerto de Nadal da Banda da Escola de Música de Rianxo. Será na sala Arcos Moldes do Auditorio de Rianxo.

O repertorio escollido pola banda terá o nexo común de ser unha homenaxe ao compositor norteamericano John Williams e, por extensión, a unha parte fundamental da música para o cinema das décadas recentes. Para quen non o saiba, John Williams é o autor de boa parte das composicións das películas de Steven Spielberg e, tamén, da saga Star Wars. Tamén é o responsábel da partitura de Só en Casa, Superman ou a saga Harry Potter.