En Noia dous brotes escolares: 18 positivos e seis aulas pechadas


Os últimos datos do Goberno de Galicia relativos á situación da pandemia nos centros escolares galegos confirman ata dous brotes de grandes dimensións en centros escolares de Noia, localidade que se atopa no nivel de risco extremo, cunha incidencia de entre 125 e 250 casos por cada 100.000 habitantes nos rexistros a sete días.

Ao brote no CEIP Plurilingüe Alexandre Rodríguez Cadarso confirmado a semana pasada e que suma xa 22 positivos -cinco máis que fai sete días-, súmase agora o brote do CPR Plurilingüe Jaime Balmes, con case unha vintena de afectados.

O brote do CEIP Plurilingüe Alexandre Rodríguez Cadarso, lonxe de remitir, pasa dos 17 casos activos do pasado mércores aos 22 que ofrece hoxe, cunha aula pechada. Trátase do sétimo centro máis afectado da comunidade nestes momentos.

A este brote súmase agora o do CPR Plurilingüe Jaime Balmes, con 18 casos activos. Esta escola concertada ten a particularidade de, a pesar de ser o noveno centro con máis casos activos, lidera a listaxe de colexios con máis aulas pechadas, cun total de seis.