Dodro conmemorou en dúas xornadas o gran agasallo da literatura

O Concello de Dodro celebrou en formato espectacular (cunha gran festa literaria de dúas xornadas -venres 10 e sábado 11- na que se puido participar presencial e virtualmente) a entrega do XXXIV Premio de Poesía Eusebio Lorenzo Baleirón.

O programa do venres arrincou ás 20.00 horas no CPI Eusebio Lorenzo Baleirón, coa presentación da obra Urda, de Quico Valeiras, gañador do premio da convocatoria 2020. Complementouse a cita co espectáculo de Aldaolado (as poetas Lucía Aldao e María Lado) Epístola de Aldaolado ás neofalantes.

Ao día seguinte, 11 de decembro, as actividades comezaron pola tardiña no CPI Eusebio Lorenzo Baleirón, onde se procedeu á entrega oficial do Premio de Poesía Eusebio Lorenzo Baleirón á escritora Inma López Silva, que se impuxo este ano coa obra Clepsidras.

O Concello, para facilitar desprazamentos e acadar a máxima repercusión destas actividades (que viñeron acompañadas de estritas medidas anti-COVId) habilitou servizos de autobuses polas aldeas para as dúas xornadas de celebración literaria en Dodro.

Amais de todo o devandito, Cultura de Dodro concedeu o Mini Premio Eusebio Lorenzo Baleirón a María Rodríguez Romero, pola súa obra O mundo dos soños. Este premio entregouse tamén na xornada do sábado.