O Concello de Boiro, a través do departamento de Deportes, organiza unha nova edición da carreira popular Mar de Boiro. 14º memorial Pepe Buceta, que vai ter lugar o vindeiro domingo día 5 de decembro. Na presentación da carreira, que tivo lugar esta mañá no Concello, participaron a concelleira de Deportes, Dores Torrado, e o técnico de Deportes, Manuel González.
A proba, incluída no calendario oficial da Federación Galega de Atletismo, consta de tres categorías distintas. As carreiras Mini e Supermini, de 200 metros, que comprende idades ata os 7 anos sairá ás 10.40 horas; a carreira curta, de 2500 metros, para escolares sairá ás 11.05 horas; e a carreira longa, de 10.000 metros, para a categoría xeral que sairá ás 11.00 horas. A liña de saída será na rúa Principal, onde se fará o corte da cinta, e percorrerá a Avenida de Compostela dirección Praia Xardín, o paseo Marítimo ata o Saltiño chegará ata Mañóns e volverá ata Boiro, onde estará a meta situada na rúa Peonil.
A entrega de trofeos está prevista para as 12.15 horas e farase na Praza de Galicia, onde se premiarán aos tres primeiros clasificados de cada categoría e aos tres gañadores absolutos, tanto masculino como feminino, e se
outorgarán premios aos tres primeiros corredores e ás tres primeiras corredoras, empadroados actualmente en Boiro, en cruzar a liña de meta; ao participante de maior idade e medallas para os participantes das carreiras Mini,
Supermini e curta. Haberá tamén clasificación de sapatilla inclusiva, unha categoría para persoas con discapacidade.
Hai xa 350 corredores inscritos en todas as categorías, pero as inscricións poden facerse ata as 23.59 horas deste xoves 2 de decembro a través da páxina web de Emesports ( www.emesports.es ).
