O Consello da Xunta celebrado este xoves 23 de decembro autorizou as expropiacións para a construción dunha glorieta no cruce da Barquiña, no concello de Noia (na intersección da vía autonómica AC-550 coa vía provincial DP-5704). O investimento será de 1,15 millóns de euros. A rotonda terá 13 metros de radio e contará cunha illa interior de dous metros e unha calzada de carril único de seis metros.
Asemade actuarase nas beirarrúas, nos dous lados da estrada, dende a nova glorieta ata a rúa Calvario (á altura da Capitanía Marítima). Isto implicará unha reorganización na sección transversal da vía, xa que na actualidade non hai marxe de abondo para o estacionamento nas dúas beiras.
A Consellería de Infraestruturas e Mobilidade convocará o levantamento das actas previas das expropiacións e licitará as obras no primeiro semestre de 2022, co obxectivo de poder iniciar os traballos no segundo semestre do ano, cun prazo de execución de 10 meses.
