A actuación está enmarcada na EDUSI ‘Máis Riveira Atlántica’, cofinanciada nun 80% con fondos europeos FEDER
O Concello de Ribeira acaba de activar unha nova actuación que se vai executar no vindeiro ano dirixida a remodelación integral da fronte marítima de Aguiño ao longo de 1.720 metros lineais e un investimento de
practicamente un millón de euros.
O alcalde Manuel Ruiz deu a coñecer hoxe as principais características deste proxecto, que se enmarca dentro da EDUSI ‘Máis Ribeira Atlántica’, que está co-financiada polo fondo Fondo Europeo de Desenvolvemento Rexional (FEDER) dentro do Programa Operativo Plurirrexional de España (POPE) 2014-2020.
A actuación abrangue entre a punta do Laño (xunto á antiga depuradora de Demarsa) e o cruce da rúa Castelao coa estrada xeral que vai a Castiñeiras. Unha primeira zona de actuación céntrase en Transporto, onde ademais da creación dun paseo pola beira do mar inclúe a habilitación dun espazo para uns vinte aparcamentos e a creación dunha zona de de Pump Track/Skate e outra de calistenia, ambas pensadas especialmente para a xuventude.
No contorno portuario construirase unha rotonda xeral de entrada ao porto e eliminarase o vial que pasa por diante da confraría e da fábrica de xeo para gañar en amplitude na praza existente, o que potenciará a súa capacidade para albergar eventos. Zonas verdes e de aparcamento serán remodeladas e crearanse dous tramos de empedrados.
Xa entrando na rúa Castelao crearase un carril bici que enlazará co que hai na rúa Torres Queiruga e que contará cunha lonxitude cercana aos 800 metros. Ademais, o contorno do campo da Tasca experimenterá unha importante transformación facultándoo como de sentido único, o que permitirá, ademais da creación do carril bici, ampliar as beirarrúas coa fin de mellorar a accesibilidade e crear máis aparcamentos, zonas verdes e algún paso elevado de peóns.
De igual xeito, habilitarase unha gradiña que servirá como miradoiro cara o Carreiro.
Durante a súa intervención, Ruiz Rivas manifestou que Ribeira está inmersa nun proceso de transformación urbana acorde coas directrices da Unión Europea, materializada xa na fachada marítima de Santa Uxía de Ribeira e que tamén abrangará á zona portuario de Palmeira e a estrada AC-305 ao seu paso por esta localidade, así como a estrada DP-7307 en Castiñeiras, A Fonteseca e A Ameixida, neste caso dentro do Plan de Sustentabilidade Turística financiado con fondos Next Generation.
