A Xunta e a Oficina Europea para a Conservación e o Desenvolvemento ( EBCD) reunirán este luns, 13 de decembro, en formato virtual a diferentes expertos europeos para debater sobre a sustentabilidade da dos alimentos do mar e a súa contribución ao coidado do medioambiente
Esta iniciativa celébrase baixo o título ‘Alimento do mar: a estratexia saudable e sostible’ e abordará a xestión pesqueira enfocada ao emprego sostible dos recursos mariños, a innovación no sector t a dieta atlántica, así como o seu papel na redución da pegada de carbono nas actividades marítimo-pesqueiras, que “xa é das máis baixas no ámbito de produción de alimentos”, segundo destaca o Goberno galego.
Este evento virtual súmase aos dous anteriores organizados pola Xunta e a Oficina Europea para a Conservación e o Desenvolvemento. O primeiro delas tivo lugar en xuño e virou ao redor da colaboración entre as ONG ambientais, a industria pesqueira e a ciencia para impulsar a sustentabilidade.
A segunda, no mes de novembro, tratou sobre posibles vías para unha produción de alimentos pesqueiros máis neutra en emisións de carbono.
Tanto a programación do evento, que terá lugar ás 15,00 horas, como o rexistro para todos aqueles interesados en participar está na web da EBCD.
A xornada coincide coa celebración do Consello de ministros de Pesca da Unión Europea e contará coa participación da conselleira do Mar, Rosa Quintana, de forma virtual.
Ademais, o anfitrión do evento será o eurodeputado do PP Gabriel Mato, tendo en conta que tamén haberá representantes da ONU para a Alimentación e a Agricultura ( FAO), do Consello Internacional para a Exploración do Mar (ICES) e a Dirección Xeral de Asuntos Marítimos e de Pesca ( DG MARE).
Así mesmo, estarán representantes da Universidade de Santiago de Compostela (USC), da Universidade de Washington, do Instituto Nacional de Recursos Acuáticos de Dinamarca e do Fondo de Defensa do Medio Ambiente. As conclusións daraas un membro do grupo de expertos en pesca da Unión Internacional para a Conservación da Natureza ( IUCN), Ernesto Penas.
Por parte da USC, estará o vicerreitor de Planificación, Tecnoloxías e Sustentabilidade, Gumersindo Feijóo, quen coordinou o grupo que realizou, por encargo da Xunta, unha análise sobre a pegada de carbono en actividades pesqueiras.
