Foi coma un lóstrego o feito de que o Comisario de Pesca da UE, Virginijus Sinkevicius, aceptara de bo grao as propostas de seis organizacións ecoloxistas para prohibir a pesca de arrastre. Tan é así que a asociación Europêche vén de solicitar unha xuntanza urxente co responsable comunitario de Pesca, Océanos e Medio Ambiente para que aclare “a verdadeira folla de ruta de Europa” á hora de conservar os recursos pesqueiros e protexer os ecosistemas mariños.
Os pescadores europeos pediron esta reunión tralo apoio público do comisario a unha campaña que, como xa informou días atrás O Barbanza, solicita “demagoxicamente”, din, a prohibición da pesca de arrastre cadrando co derradeiro día da consulta pública aberta pola Comisión Europea para preparar o novo plan de acción para a pesca europea no marco da Estratexia de Biodiversidade 2030.
Queren os pescadores falar cara a cara, é dicir, en persoa, co comisario para coñecer a súa postura en relación co arrastre. CEPESCA -asociación que forma parte de Europêche- pon riba da mesa o feito de que desta actividade extractiva dependen 10.000 barcos europeos -900 deles de España- e as súas tripulacións. Estas representan un 11% da frota pesqueira comunitaria, o 35% da capacidade pesqueira da UE e o 38% dos ingresos do sector, segundo datos facilitados pola patronal.
No fondo desta solicitude de entrevista subxace o feito ou necesidade de saber que plans ten o comisario sobre a realidade dese importantísimo segmento de frota comunitaria, que valor ten para el o esforzo do sector para contribuír á sustentabilidade medioambiental e que seguridade pode proporcionar ós pescadores europeos de arrastre perante campañas “meramente demagóxicas, sen fundamento científico e incapaces de medir as consecuencias, tanto económicas como sociais, para moitas comunidades de cidadáns europeos”. Reclaman que se transmita a vontade de solventar os diferentes criterios sobre esta actividade “con un diálogo serio e responsable” que leve a que as partes actúen dende a honestidade e o coñecemento, marco no que “non caben as emocións e, moito menos, a demagoxia”.
Javier Garat, presidente de Europêche e secretario xeral de CEPESCA, dixo que están “realmente sorprendidos coa actitude do comisario de Pesca cos seus pescadores europeos. É incomprensible e inesperada e evidencia descoñecemento, non sabemos se voluntario ou non, sobre o feito de que o arrastre xa ten pechados todos os lugares do mundo nos que existen ecosistemas vulnerábeis”. Ao mesmo tempo, engade Javier Garat, “os pescadores lamentamos a demagoxia de quen, sen vivir da actividade pesqueira, demonizan o arrastre con informacións falsas que xeran confusión nos cidadáns, nas institucións e nas persoas que as representan”.
O sector chama a atención, ao mesmo tempo, a Sinkevicius sobre a existencia doutros cidadáns e sectores da actividade económica europeos indignados con esta “visión única ambientalista da pesca, pola súa inconsistencia, ignorancia e lonxanía da realidade”, afirma CEPESCA. Neste senso, o sector vai manifestar ao comisario a conveniencia de lexislar pensando nas necesidades e puntos de vista de todas as partes “para evitar un conflito que a sociedade europea, máis aínda coa situación sanitaria incerta que vivimos, non necesita nin se pode permitir”, segundo recolle a publicación Industrias Pesqueras.
