A empresa Tungsten San Finx ten solicitada autorización para verter ao río Pesqueira augas residuais industriais depuradas procedentes da explotación mineira de estaño e wolframio de San Finx (en Lousame). Esta autorización abrangue o acondicionamento do cauce para a retirada dos sedimentos acumulados no dominio público hidráulico na contorna das presas. A mina incumpre a normativa dende o ano 2009, motivo polo que a deputada nacionalista Rosana Pérez esixe á Xunta un compromiso co medio ambiente e deixar de “mirar para outro lado” co obxectivo de “favorecer ás empresas mineiras”. Os veciños da comarca de Muros-Noia, as corporacións municipais de Noia, Outes e Porto do Son e as confrarías de pescadores da devandita ría rexeitan tal autorización (que a Xunta semella está a tramitar) e as consecuencias de 12 anos de irregularidades por parte da mina.
A ría de Muros-Noia está a só 7 quilómetros da mina. Unha ría sumamente rica que da postos de traballo directo e indirecto a non menos de catro mil persoas. Por isto, e por outras cousas, non se pode permitir pendurar un cartel anunciando o seu “peche por defunción”, dixo Rosana Pérez, por mor dunha a ctividade mineira. Para a deputada do BNG, a Xunta “permitiu e permite” este estado de cousas negando unha e outra vez os seus impactos “non se sabe en base a que intereses e mesmo sendo cómplice e facilitadora dunha situación que os propios informes técnicos de Augas de Galicia poñen en cuestión”.
A da Xunta para coa empresa que xestiona San Finx é “unha connivencia clamorosa” dende 2009, ano no que a empresa retomou a súa actividade mineira “sen un proxecto de avaliación ambiental e sen exposición pública”. Unhas actuacións que remataron no xulgado e que levaron ao daquela director xeral de minas a ser investigado e deixar de ocupar ese cargo. Malia todo, a Xunta subvencionou, afirma a deputada nacionalista -entre os anos 2009 e 2013- con máis de 2 millóns de euros e o IGAPE con 800.000 euros á empresa e esta declarábase en concurso de acreedores no ano 2013, sen pagar a nómina dos seus traballadores durante seis meses.
Máis tarde, segundo relata a deputada, para seguir a tapar unha autorización que databa do ano 2009 sen avaliación ambiental, “quixeron que asumiramos que as presas de resíduos mineiros, abandonadas e colmatadas, eran, segundo un informe da Xunta, “presas hidroeléctricas vencelladas a muiños”. Unha historia que mantiveron durante 10 anos ata que un informe de Augas de Galicia do ano 2019, corroborou que “as presas, a súa xestión e a súa explotación eran realizadas pola empresa mineira”.Unha mentira mantida moitos anos, coa Xunta ollando de esguello cara outra banda, tivo e segue a ter consecuencias no territorio “a pesar dos informes técnicods e científicos como os publicados pola Universidade de Oviedo, que constatan a presenza de minerais radioactivos, ou os da Universidade de Vigo, q-ue evidencian a contaminación da ría por metales pesados vencellada á actividade mineira de San Finx.
A solicitude de verquidos non deixa de ser “unha verdadeira ameaza” e a mina “no pode reabrir sen a avaliación ambiental”.
Debe de se lle esixir a Tungsten San Finx a presentación dun novo proxecto de explotación e o respectivo estudo de impacto ambiental, así como o sometemento a unha tramitación rigorosa de avaliaciòn ambiental.