A licitación da ampliación da Fieteira cun módulo cuberto de atletismo sacarase co inicio do novo ano

O alcalde de Ribeira, Manuel Ruiz, vén de asinar á addenda ao convenio de colaboración entre a Secretaría Xeral para o Deporte da Xunta e o Concello para volver sacar a licitación as obras de ampliación do Complexo Deportivo de A Fieiteira a través dun Módulo Cuberto de Atletismo. A previsión é de sacar a licitación a principios do 2022.

Fontes do Concello lembran que unha primeira licitación impulsada no pasado verán ficara deserta “por mor do encarecemento sufrido polos materiais de construción”, o que levou á actualización dos custes incluídos no proxecto, que na nova licitación ascenderá a 1.542.632,10 euros.

De resultas da addenda firmada, a Secretaría Xeral comprométese a financiar un millón de euros en tanto que o Concello asumirá o importe restante, o que supón un aumento do 102.649,57 euros sobre a súa achega inicial: cantidade esta última que irá consignada na anualidade do 2023.

O pavillón albergará unha zona de adestramento cuberta para atletismo, mediante un módulo que conta con pista de 5 rúas, zona de saltos, lanzamentos; espazos para ximnasio, sala de musculación e actividades de tecnificación para a práctica do taekwondo; construción de novos vestiarios, aseos e duchas e o seu equipamento; ademais das reformas de accesibilidade e acceso ao primeiro andar.