A xerente de Solo Empresarial do Atlántico, SEA, Beatriz Sestayo, reuniuse con Julio Gonzalo García, director da Zona Norte de UFD, distribuidora eléctrica de Naturgy co obxectivo de “mellorar a coordinación coa compañía eléctrica, en beneficio das empresas instaladas nos polígonos empresariais”.
Na reunión abordouse a posibilidade de que a compañía colabore no Plan Estratéxico de Solo Empresarial, co fin de establecer unha mellor coordinación de face aos futuros proxectos de desenvolvemento de novo chan empresarial que prevé SEA.
Deste xeito, informou a entidade, “establecéronse novos ámbitos de comunicación, que beneficiarán tanto ás actuais como ás futuras empresas dos 13 polígonos empresariais que xestiona SEA en Galicia”, incluídos os de A Pobra do Caramiñal, Rianxo e Muros.
Beatriz Sestayo expuxo ao delegado da Zona Norte algunhas das problemáticas que diferentes empresas transmitiron a SEA. Amais, explicoulle que a entidade está en fase de análise de futuros proxectos, ao percibir a demanda existente, ante o auxe de determinados sectores. Isto materializaríase nunha posíbel ampliación dalgúns polígonos industriais nos que practicamente esgotouse a superficie dispoñíbel e máis no desenvolvemento de novas zonas.
