Abanca vén de facer reconto do acadado este ano a través do seu proxecto de sustentabilidade Redes Vivas, destinado a facilitar a recuperación de redes no mar e darlles novos usos alternativos. O programa, segundo sinala a entidade financeira, permitiu recuperar este ano 1.400 quilos de redes de pesca abandonadas en espazos costeiros e darlles unha nova vida dentro dos campos deportivos.
No proxecto colaboraron arreo redeiras artesás de Corme e Malpica, que transformaron os apeiros apañados en 1.500 m2 de novas redes que permitirán renovar 78 porterías de 39 clubs patrocinados polo banco no marco do seu proxecto Abanca Deporte Base. Ata o momento entregáronse 40 redes a 20 clubs e o resto das entregas realizaranse en 2022. Máis de 5.000 deportistas das catro provincias galegas beneficiaranse das novas redes instaladas nas súas canchas e campos deportivos.
