A Consellería do Mar, a través de Portos de Galicia, iniciou na mañá deste 5 de novembro a reflotación dos restos do buque pesqueiro L´Etel, afundido no porto de Ribeira en xaneiro de 2020. Unha vez rematada a complexa tramitación administrativa requirida e ante a falta de resposta dos seus titulares, aos que segundo sinala Portos instouse a asumir a tarefa directamente por ser súa a responsabilidade, o organismo da Consellería do Mar contratou estas actuacións por importe de 332.000 euros, un investimento que adiantará o ente público. Amais da recuperación do buque, os traballos inclúen a súa xestión e tratamento.
Máis en detalle, os labores, que contan cun prazo de execución de arredor de cinco meses, consisten na reflotación e remolque do buque e o traslado dos restos ata un centro de despezado autorizado para a súa xestión. Previamente realizarase a inspección do pecio e a extracción dos residuos que se atopen a bordo do buque e a súa xestión por unha entidade autorizada. O servizo contratado inclúe tamén as actuacións de sinalización, balizamento e preparación dos accesos e zonas de traballo.
A Consellería lembra que o buque pesqueiro L´Etel afundiu no porto de Ribeira o 22 de xaneiro de 2020 a unha profundidade de seis metros en relación co nivel 0 do porto. Nas horas próximas á baixamar parte do seu costado de babor facíase visíbel, polo que “era necesaria a súa reflotación e retirada por razóns de seguridade e explotación portuaria”, sinala o departamento de Rosa Quintana.
