O PBBI require ao Concello de Ribeira máis mantemento e iluminación axeitada para a pista multideporte de Aguiño

O Partido Barbanza Independente (PBBI), a través do seu portavoz Vicente Mariño, presentou ao pleno da Corporación de Ribeira, unha moción relativa á pista multideporte de Aguiño, situada ao carón do Campo da Tasca. Segundo sinalan, a infraestrutura atópase neste intre “nunha situación de abandono”. O PBBI sinala que esta opinión é compartida pola veciñanza, que contactou co PBBI, engade, para “indicarnos que solicitaron unha correcta iluminación e o alcalde e o seu equipo de Goberno fan caso omiso a esa demanda”.

En opinión da plataforma que dirixe Vicente Mariño, o abandono ao que foi sometida a pista é un exemplo “do desleixo do Executivo local ante os proxectos realizados no concello con grandes investimentos que, acto seguido da súa materialización, son abandonados”.

Por todo iso, o PBBI solicita a aprobación destes puntos:

1-Que o Concello de Ribeira proceda a dotar das luminarias suficientes para poder gozar da pista multideporte SD Xuventú Aguiño nas debidas e óptimas condicións cando anoitece.

2-Que o Concello de Ribeira proceda á limpeza e mantemento da pista multideporte de Aguiño así como da súa contorna.

3-Que o Concello de Ribeira proceda á plantación de árbores ornamentais no merendeiro lindeiro.

4-Que o Concello de Ribeira proceda a instalar papeleiras na contorna da pista multideporte SD Xuventú Aguiño.