O deputado Blas García visitou Lampón- Boiro para coñecer as obras feitas pola Deputación

O Deputado provincial da área de Promoción Económica, Blas García, vistou esta mañá Boiro para coñecer as obras subvencionadas pola entidade provincial para o acondicionamento de terreos destinadas ás actividades da Comisión Parroquial de Santiago de Lampón. Durante e visita estivo acompañado do alcalde, José Ramón Romero, o concelleiro de Urbanismo e Obras, Luis Ruiz, e representantes da entidade veciña.
Coa subvención concedida pola Deputación da Coruña, a entidade acondicionou uns terreos en Lampón co obxectivo de realizar unha ampliación da nave na que actualmente se gardan os materiais para a Cabalgata de reis que realiza a entidade. “Queremos poder ampliar este espazo para poder gardar os materiais da cabalgata e tamén levar a cabo actividades e obradoiros para a veciñanza”, afirmou o membro da entidade veciñal, Marcelino Sánchez.
Esta subvención da Deputación da Coruña está dentro dunha liña de axudas da área de promoción económica para que institucións e asociacións poidan levar a cabo actividades. “Esta axuda é un claro exemplo do compromiso da Deputación da Coruña, non so con institucións senón tamén con pequenas asociacións e entidades veciñais”, afirmou o deputado provincial Blas García.
O alcalde de Boiro, José Ramón Romero, agradeceu á Deputación o seu compromiso coa veciñanza de Boiro, colaborando con entidades como a Comisión Parroquial de Santiago de Lampón, e tamén o traballo que a asociación veciñal fai con actividades para todo o pobo. “A cabalgata de reis de organizan é un traballo que a entidade fai para todo a veciñanza de Boiro e ter un sitio para desenvolver estas actividades é fundamental para seguir
medrando”, recoñeceu o alcalde.
Durante e visita a Boiro, Blas García tivo a oportunidade de reunirse co alcalde e o concelleiro para conversar sobre liñas de traballo conxunto entre as dúas administracións e participou tamén nos actos que o Concello de Boiro
organizou con motivo do 25N, unha lectura de poemas coas voces de mulleres de entidades sociais do municipio.