O Concello de Porto do Son informou de que está a pleno rendemento, nestes días previos ás festas do Nadal, o servizo de Roupeiro Municipal, onde a cidadanía pode entregar prendas ou calzado que non precise ou ben requirir aquilo que si necesite.
A finalidade é “dar unha segunda oportunidade de uso ás prendas que recibimos, deste xeito contribuímos á reutilización e á reciclaxe de roupa e calzado, ao tempo que axudamos a familias do noso concello a reducir os seus gastos económicos ofrecéndolle estas prendas de segunda man”, explican fontes do Concello de Porto do Son (áreas de Benestar Social e Medio Ambiente), ao tempo que fai saber que as persoas que queiran colaborar poden facelo chamando ao teléfono 698197909 para establecer cita. O horario é o seguinte: os martes e xoves en horario de 10.00 a 12.00 horas, e, no Punto Limpo local, de luns a sábado en horario de 10.00 a 14.00 horas.
