O Concello de Ribeira quere que o módulo de atletismo cuberto da Fieiteira sexa licitado no primeiro trimestre de 2022

O alcalde de Ribeira, Manuel Ruiz, mantivo unha reunión co secretario xeral para o Deporte da Xunta de Galicia, José Ramón Lete, a través da cal abordaron (entre outras cuestións) o módulo de atletismo cuberto que está previsto construír no Complexo Polideportivo da Fieiteira: unha actuación respecto da cal a licitación levada a cabo este verán non prosperou e que, segundo foi informado o alcalde, “será licitada novamente no primeiro trimestre de 2022”. Iso si, dixo, “logo de actualizar algúns dos custes incluídos no proxecto de tal xeito que o prezo material por contrata rolde os 1,5 millóns de euros”.

Ruiz dixo que a previsión é de que as obras poidan estar en marcha o vindeiro verán.
Tamén explicou que o pavillón albergará unha zona de adestramento cuberta para atletismo, mediante un módulo que conta con pista de 5 rúas, zona de saltos, lanzamentos; espazos para ximnasio, sala de musculación e actividades de tecnificación para a práctica do taekwondo; construción de novos vestiarios, aseos e duchas e o seu equipamento; ademais das reformas de accesibilidade e acceso ao primeiro andar.

A obra está co-financiada polo Concello de Ribeira e a Secretaría Xeral para o Deporte.