O alcalde de Boiro visita a residencia de maiores de Silleda para coñecer o seu funcionamento

Con vistas a recadar información de valor para o proxecto de construción dunha residencia pública da terceira idade en Boiro, o alcalde José Ramón Romero o mailo concelleiro de Servizos Sociais, Raúl Treus, visitaron este 11 de novembro o fogar do maior de Silleda. Fixérono acompañados do alcalde do municipio da comarca do Deza, Manuel Cuíña, a concelleira de Benestar Social, Ángela Troitiño, e persoal da residencia.

Durante a visita o rexedor boirense reuniuse co seu homólogo en Silleda para coñecer como se realizou a execución do proxecto e como é o modelo de xestión da mesma. “En Boiro temos os terreos e queremos facer o proxecto para garantir unha residencia cunhas garantías de calidade e servizos para os nosos veciños e veciñas”, afirmou o alcalde, José Ramón Romero, durante a súa estadía no concello do Deza.

Treus, pola súa banda, explicou que nos últimos dous anos o Executivo local mantivo diversos contactos coa Consellería de Política Social da Xunta de Galicia para dar resposta a “unha demanda histórica dos veciños e veciñas de Boiro”, explicou, engadindo que “Boiro é un lugar estratéxico para a comarca do Barbanza cunha poboación substancialmente envellecida e unha residencia é fundamental, polo que imos seguir traballando con todos os medios para poder levala a cabo”.

Alcalde e concelleiro recordaron que o Concello dispón de terreos para a construción da residencia, que foron postos xa a disposición da Xunta, en dúas localizacións distintas. Uns nunha zona semiurbana, na finca de Goiáns, e outros nunha zona urbana, a carón do parque da Cachada. Ademais, na proposta orzamentaria realizada para o ano 2021 que se debaterá no pleno do vindeiro luns incluíuse unha proposta orzamentaria para a redacción do proxecto.