María Rivas salienta en Dodro os esforzos do Concello pola recuperación medioambiental

A subdelegada do Goberno na Coruña, María Rivas, estivo este martes 23 de novembro en Dodro, onde supervisou, na compaña do alcalde, Xabier Castro, as obras impulsadas pola Demarcación de Costas e o Concello nas Brañas de Laíño, que se dirixen a renovar e mellorar a accesibilidade nas mesmas e potenciar a súa protección e o seu coidado. Rivas trasladou ao rexedor o seu respaldo ás políticas de recuperación ambiental no municipio, en relación á devandita actuación desenvolvida nas Brañas, un dos grandes tesouros naturais do concello e da nosa contorna.

Rivas, que acudiu a Dodro acompañada polo xefe da Demarcación de Costas de Galicia, Rafael Eimil, lembrou que a actuación nas Brañas consiste “na naturalización dun espazo que nestes momentos é unha vía de tráfico rodado para reconvertelo nunha senda peonil e ciclista, que mellorará a protección ambiental e a conservación desta zona protexida”. Rivas e Eimil recordaron que para a consecución do proxecto utilízanse “materiais granulares que servirán de base do pavimento” e realizaranse as obras complementarias para “asegurar a perdurabilidade da actuación que se desenvolve en máis dun quilómetro de lonxitude”. O orzamento supera os 70.000 euros.

Recuperación ambiental e colaboración veciñal

Segundo engadiron, o Concello de Dodro e a Demarcación de Costas están a traballar conxuntamente na recuperación ambiental da zona. De feito, o departamento do Ministerio de Transición Ecolóxica ten previsto autorizar ao Consistorio a concesión dos terreos precisos para “xestionar o espazo cos veciños e permitir os usos tradicionais”. Será a partir desa concesión, sinalaron, cando se definan as colaboracións de Costas e do Ministerio de Transición Ecolóxica na recuperación das Brañas, tendo en conta para iso o proxecto que queira desenvolver e presentar o Concello.

Alumeado público sustentábel

María Rivas analizou tamén co alcalde o proxecto de renovación da iluminación pública subvencionada polo Ministerio de Transición Ecolóxica a través do Instituto para a Diversificación e Aforro da Enerxía (IDAE), plan que xa foi licitado por parte do Goberno municipal e que prevé a renovación das luminarias en lugares como Lestrove, Bexo e Tallós. O proxecto inclúese dentro do plan de axuda ás entidades locais para proxectos de investimento en economía baixa en carbono e ten un importe de 128.000 euros. O oitenta por cento do investimento, 102.000 euros, corresponde ao IDAE, mentres que o Concello achega 26.000 euros. Actuarase sobre 371 puntos de luz, estando previsto un aforro enerxético do 64,4 por cento e un aforro económico de 9.100 euros anuais para as arcas municipais.

A subdelegada do Goberno quixo poñer en valor “o esforzo” do Goberno municipal na redacción do Plan Turístico Sostible de Dodro, que o Concello presentou á convocatoria extraordinaria do Plan de Sustentabilidade Turística en destinos para Entidades Locais 2021 realizada pola Secretaría de Estado de Turismo. O custo desta iniciativa elévase a 1,2 millóns de euros.

A intención do Concello coa solicitude destas axudas é a transformación e creación “dunha oferta turística sustentábel e responsábel co medio ambiente”, todo iso cunha “axeitada planificación previa”. Para iso preténdese potenciar os valores culturais, naturais e paisaxísticos do municipio de forma respectuosa coa conservación do medio e atraer a un turismo concienciado cos tesouros ambientais da contorna.