A Asociación Ambar das persoas don diversidade funcional rematou este domingo 14 de novembro a xira de As paisaxes de Camille, proposta teatral coa que as integrantes da entidade quixeron dar voz á súa loita contra a violencia de xénero, poñendo o foco naquela que se perpetra contra as mulleres do rural. A conclusión da xira foi en Mondoñedo, logo das recaladas na Rúa (Ourense), A Estrada, O Pino e Noia.
En total, As paisaxes de Camille, unha homenaxe á escultora francesa Camille Claudel, foi vista por máis de 100 espectadores e espectadoras. O público estivo composto por usuarias e usuarios de centros educativos, asociacións de persoas con diversidade funcional e representantes dos CIM, Servizos Sociais e alcaldías dos Concellos citados, entre outros.
Como dixemos, o proxecto As paisaxes de Camille foi unha iniciativa para loitar, dende a creatividade, o talento e a reivindicación, contra a violencia de xénero no ámbito rural en calquera das súas manifestacións. En concreto As paisaxes de Camille busca apoderar ás mulleres con diversidade funcional a través da expresión artística, explorando a contención, a rabia, a delicadeza e a sororidade, atravesando a imaxinaría escultórica e a vida da escultora francesa Camille Claudel.
A peza está producida por Ambar, conta coa dirección artística da creadora escénica Helena Salgueiro da plataforma ABAR e cun elenco composto integramente por mulleres con diversidade funcional: Noelia Argibay, Ángeles Devesa, Marina Mondelo, Conchita Mouriño, Carmen Pérez, Olaia Pérez, Montse Queiruga e Mercedes Río.
Esta acción enmarcase no Pacto do Estado contra a violencia de xénero e está financiada pola Axencia Galega de Desenvolvemento Rural.
Para máis información sobre o proxecto cómpre visitar a web de Ambar, no apartado específico sobre o mesmo. As integrantes da asociación tamén subiron ao Youtube un vídeo de presentación.
