Lectura colectiva de poemas en Boiro con motivo do 25-N

O xoves 25 de novembro, coincidindo coa celebración do Día Internacional contra a Violencia de Xénero, será o día grande da fronte común da sociedade boirense en contra da lacra do maltrato ás mulleres. O Concello organizou nesta xornada diversas actividades participativas, como por exemplo unha lectura colectiva de poemas de Charo Lopes (escritora e activista de Boiro) e Lucía Aldao (escritora e activista coruñesa). Será no Consistorio a partir das 13.30 horas.

No acto escoitaranse as voces das mulleres da Asociación Ambar para persoas con diversidades funcionais e cognitivas (moi implicada coas reivindicacións do 25-N, tal e como quedou de manifesto coa súa intervención teatral As paisaxes de Camille, que foi de xira por Galicia), das usuarias do Centro de Día de Boiro e do alumnado dos centros educativos do concello. Organizan o Concello e máis a Deputación.