Este venres 3 decembro temos unha cita con A lingua das bolboretas en Boiro

Este venres 3 de decembro chega a Boiro a adaptación teatral que elaborou a compañía Sarabela Teatro do conto A lingua das bolboretas, de Manuel Rivas. Será a partir das 21.00 horas na Casa da Cultural. O espectáculo, unha cita cultural para público adulto, terá dispoñíbeis as entradas o mesmo día da función a partir das 19.00 horas.

Como lembraremos, o relato de Rivas, incluído en Que me queres amor? (Galaxia), conta a historia de don Gregorio, mestre republicano que mantén unha estreita relación de coñecemento e liberdade cos seus alumnos, especialmente con Pardal, un rapaz que é testemuña directa, a través do seus ollos inocentes, das terríbeis consecuencias que tivo a Guerra Civil para milleiros de persoas que non compartían a ideoloxía do alzamento nacional e que, como o mestre, convertéronse nas primeiras vítimas directas da fin da liberdade.

Nesta proposta teatral a compañía combinará dous dos escritos de Manuel Rivas (A lingua das bolboretas e A Traxectoria do Balón) co “propósito de que a mensaxe chegue nidia ao tempo que se xoga coas imaxes e coa poética que nos leva a un espectáculo punteiro dentro da nosa historia escénica”.

Desde a chegada ao novo milenio, será esta a cuarta colaboración da Compañía co autor: O lapis do carpinteiro (2000), O heroe (2005) e Os libros arden mal (2007) foron as anteriores. Se con O Heroe celebráronse os 25 anos da Compañía, con A lingua das bolboretas conmemorarase o 40 aniversario de Sarabela.