Este sábado preséntase Taragoña na historia de Xosé Ramón Brea Rei

Este sábado 27 de novembro novamente falaremos de libros en Rianxo. En concreto, presentarase no Centro Cultural de Taragoña o libro Taragoña na historia, de Xosé Ramón Brea Rei, que chega ao nós con motivo do 90 aniversario da Escola Rosalía de Castro. Presentará o acto Xosé Benito Tubío Fachado (profesor) e contarase coas intervencións da deputada provincial Sandra González Castro en representación da Deputación da Coruña (entidade editora), Adolfo Muíños (alcalde de Rianxo) e o propio autor, Xosé Ramón Brea Rei.

A apertura e o peche musical da cita, virá da man de Valentín Rial (saxofón) e Tano Domínguez (piano).

Para asistir temos que reservar localidades na web municipal, no apartado de reservas.

Brea Rei nunha imaxe na Galipedia de Ermida de Bexo

Un libro de investigación

Nesta nova publicación, o escritor e investigador taragoñés ofrécenos un amplo traballo de investigación iniciado no ano 2019, co gallo da conmemoración do 90 aniversario da escola Rosalía de Castro. Malia que a idea inicial era centrarse na creación e posta en marcha da escola, construída, como tantas outras en Galicia grazas á xenerosidade da veciñanza emigrada na Arxentina, o libro afonda na vida e na historia da parroquia, en persoeiros relevantes da mesma, feitos e acontecementos.