Barbanza Arousa estará presente no Salón Xantar de Turismo Gastronómico

Do 3 ao 7 de novembro vaise celebrar en Ourense a nova edición do Salón Internacional de Turismo Gastronómico, Xantar 2021, co obxectivo de “ofrecer cinco días de intensa actividade” para reivindicar a longa listaxe de produtos de calidade da nosa terra e as moitas e variadas propostas dos nosos expertos en cociña. Haberá demostracións en directa cos mellores chefs, catas comentadas, maridaxes, degustacións, conferencias de expertos e presentacións de produtos innovadores.

Na feira, organizada por Expourense, estará presente a Mancomunidade Barbanza Arousa, a entidade turística dos concellos de Rianxo, Boiro, A Pobra do Caramiñal e Ribeira. Contará no evento cun stand de seu, onde organizará unha completa axenda de actividades. O día 3 ás 13.00 horas a mancomunidade achegará unha degustación de pratos elaborados a base de conservas e ás 19.30 horas un showcooking baixo o seguinte epígrafe: Sabores de Orixe: Barbanza Arousa.