O Concello de Ribeira, a través do alcalde Manuel Ruiz, formalizou na mañá destes 26 de novembro cinco acordos de colaboración con outras tantas entidades sociais con presenza no termo municipal, co obxectivo de respaldar a súa importante actividade. Trátase das seguintes asociacións: A Creba, Ambar, Amicos e Renacer e a Fundación Faibén de Apoio á Infancia.
No acto, na que tamén estivo presente a concelleira de Servizos Sociais Ana Barreiro, o rexedor salientou “o labor que estas entidades están a realizar no noso municipio en aras a reducir a desigualdade”.
O importe global da contía destinada a estas cinco entidades ascende a 15.000 euros (3.000 euros cada unha), cifra que o alcalde comprometeuse a incrementar na próxima anualidade.
As achegas están dirixidas a colaborar no programa de transporte de usuarios da asociación A Creba; o proxecto Vivindo na comunidade de Ambar (unha vivenda con capacidade para 5 persoas con diversidade funcional, que serve de ponte á vida autónoma e independente), o servizo de atención psicopedagóxica de Amicos; o programa Proxecto contigo da Fundación Faibén (programa destinado a acompañar e apoiar os proxectos de vida das persoas que viviron parte da súa infancia ou adolescencia nas casas de familia de Faibén), e o desenvolvemento das campañas informativas e de sensibilización no ámbito do consumo de drogas, uso/abuso das novas tecnoloxías, embarazos non desexados, VIH/SIDA e outras infeccións de transmisión sexual que promove a Asociación Renacer.
