A conselleira do Mar, Rosa Quintana, participou hoxe na celebración do sorteo de 20 cestas mariñeiras entre os 100
visitantes que nos últimos meses completaron o pasaporte da Rede de Espazos Museísticos Atlánticos (REMA) -é dicir, que visitaron polo menos cinco dos museos integrados na rede- e entre os seguidores en redes sociais desta iniciativa promovida por grupos de acción local do sector pesqueiro (GALP) de España e Portugal. A titular de Mar, que estivo acompañada pola directora xeral de Desenvolvemento Pesqueiro, foi a encargada de extraer as papeletas nunha acción que pretende animar aos cidadáns a visitar os museos atlánticos, uns espazos que son fundamentais para a difusión da cultura mariñeira e a protección do patrimonio marítimo-pesqueiro de Galicia.
A actividade, desenvolvida ao abeiro do proxecto de cooperación interterritorial e transnacional para o desenvolvemento sostible das zonas de pesca Pasaporte Rema, pretende impulsar a peregrinación polos museos da rede a través do selo Remiña que, ao estilo da Compostela do Camiño de Santiago, serve para acreditar o paso por cada un deses espazos. Os premiados con 19 cestas son persoas que entre o 18 de maio e o 1 de novembro deste ano completaron o seu pasaporte ao visitar polo menos cinco museos da rede REMA. Mentres, o último gañador correspóndese cun dos participantes no concurso a través das redes sociais. As cestas dos premios están feitas polas redeiras de Corme e o seu contido inclúe produtos do mar e experiencias ou aloxamentos relacionados con distintos proxectos dos grupos de acción local do sector pesqueiro.
