Unha das grandes riquezas da nosa comarca, non só económicas, senón culturais, sociais e ambientais, está estes días especialmente presente na Casa da Cultura de Porto do Son. Falamos da tradición marisqueira, o fío temático principal da exposición que o fotógrafo Pedro G. Losada instalou no devandito edificio municipal e que poderá visitarse até o 15 de decembro baixo o seguinte epígrafe: Marisqueo na Ría de Muros-Noia. Patrimonio Cultural Inmaterial.
A mostra, inaugurada este 6 de novembro, está formada por fotografías que recollen o día a día das mulleres e homes que desenvolven o seu labor sementando e recollendo marisco nas praias da ría de Muros e Noia. Trátase dunha homenaxe “as xeracións de mariscadores que deron forma a unha actividade que é moito máis ca un oficio, e que está gravada na paisaxe e na cultura desta comarca”, sinalou Pedro Losada.
A exposición vén da man dos Concellos de Porto do Son e Noia e do GALP da ría de Muros e Noia.
