Os proxectos semente son tres iniciativas sostibles que foron seleccionadas na convocatoria aberta organizada polo Laboratorio en xullo de 2021 e ás que se lles brindou unha achega económica de 5.000€, ademais de apoio técnico.
O anuncio produciuse nunha presentación e rolda de prensa que tivo lugar no salón de plenos do concello de Rianxo, nunha xornada que contou coa presenza dos máximos representantes das entidades que colaboran no proxecto: a Fundación Banco Santander, a Fundación RIA e a Universidade de Santiago de Compostela.
• Rodrigo Echenique, presidente da Fundación Banco Santander, entidade cofinanciadora do proxecto.
• Borja Baselga, director da Fundación Banco Santander.
• David Chipperfield, presidente da Fundación RIA, entidade coordinadora do proxecto.
• Antonio López, reitor da Universidade de Santiago de Compostela (USC)
• Lourenzo Fernández, catedrático e coordinador do grupo de investigación HISTAGRA (USC)
Tamén estiveron presentes na xornada a directora xeral de Desenvolvemento Rural, Inés Santé; o subdirector de planificación e dinamización do medio rural, Alfredo Fernández Ríos e os alcaldes de Rianxo, Adolfo Muíños; Dodro, Xabier Castro, e Porto do Son, Luís Oujo; así como os promotores dos proxectos semente premiados polo Laboratorio Ecosocial do Barbanza.
A rolda de prensa foi só un dos eventos que tiveron lugar na xornada de onte.
Os representantes da Fundación Banco Santander, a Fundación RIA e a Universidade de Santiago de Compostela visitaron as brañas de Laíño e o Campo de Maneiro no monte O Fieitoso de Taragoña para coñecer os progresos dos “proxectos semente” da man dos seus promotores.
A comunidade de Baroña como exemplo na xestión do territorio
Pola tarde, os representantes das entidades visitaron o monte veciñal en man común de Baroña guiados polo seu presidente, Ovidio Queiruga. Queiruga mostrou as actividades de conservación e produción que leva a cabo a comunidade (aproveitamentos resineros, micolóxicos, plantacións de frondosas, cría de gando, actividades de lecer, etc.) e resaltou a importancia de reinvestir no monte os ingresos obtidos destas actividades para a creación de postos de traballo no territorio.
