A biodiversidade mariña e a Lei de Pesca, a debate en Celeiro

A Confraría de Pescadores Santiago Apóstolo de Celeiro recupera este xoves 25 de novembro, e ata o vindeiro sábado (inclusive), as Xornadas Técnicas de Difusión do Sector Pesqueiro que por mor da pandemia de coronavirus non se puideron levar a cabo ano pasado cadrando con XXV aniversario desas xornadas.
A confraría e o porto de Celeiro, coa Xunta e o apoio do FEMP, recupera este ano esa traxectoria que, ao mesmo tempo, é un recoñecemento dos intereses profesionais dos seus asociados  nunhas vodas de prata que, segundo dixo o secretario do pósito, Máximo  Díaz, “son un motivo de satisfacción polo traballo realizado até a data e que emana dos propios profesionais do sector”.

As xornadas ábrense hoxe co discurso inaugural do presidente de Cajamar-Caja Rural, Eduardo Baamonde Noche. A continuación debaterase sobre a biodiversidade mariña e a lei de Pesca ante a crise ecolóxica e social, a enerxía eólica e a actividade pesqueira, a dixitalización pesqueira, a comercialización, o FEMPA 2021-2027 e o Brexit, etc. No desenvolvemento destas xornadas entra tamén un acto de homenaxe ao Servizo de Gardacostas de Galicia. Unha das novidades desta edición é o formato híbrido (presencial e online) da mesma.