O filósofo chinés Confucio, xa advertiu: o bo líder sabe o que é verdade; o mal líder sabe o que se vende mellor. Transcorridos 2.500 anos da aseveración do sabio, nestes tempos de cambios, de convulsión e oportunidade, temos que recorrer á proposta de psicólogo para discernir se nos estamos volvendo tolos ou simplemente evolucionamos pola senda da cordura cara á destrución. Falar non por falar, falar para comunicar, para enlazar experiencia, para explicar o que funcionou en cada organización ou empresa galega é o que nos propón cada ano Libredón, é como un diván de solucións.
É un pracer escoitar, sen espaventos nin egos, nun formato áxil e directo á nova Galicia, as experiencias de novos e vellos emprendedores como Juan Luis Castro, Presidente Executivo de Castrosua; Carlos Martínez Fontana, Ceo de Einsa Sourcing; Argimiro Fernández, presidente do Grupo GSI; Lina Solla, Directora Xeral de Marisco Linamar; Doura Casal, Directora Executiva de Roberto Verino; Marián Mouriño, Ceo do Grupo Corporativo GES; Andrés Fernández, Ceo do Grupo Zendal; Anxo Rivera, do Banco de Santander ou Enrique García, Ceo do Grupo Profand. As súas achegas son a evidencia de que é posible superar as crises e a pandemia con éxito. Debe facerse, como dixo Alfonso Rueda, Vicepresidente da Xunta de Galicia, con “un espírito de diálogo, que afaste discrepancias ideolóxicas ou de competencia, con talento e con talante, en modo parecido á colaboración que nos levou ao éxito do XACOBEO.”
A convocatoria, agora chamada “100 Consellos Santander”, por aquilo da necesidade de patrocinios, reuniu de novo no Palacio de Congresos de Santiago, a decenas de directivos e líderes empresariais galegos dispostos afrontar as incertezas do 2022 “cun enfoque realista, adaptando ás circunstancias que xurdan con planificación, flexibilidade e determinación”. Son palabras do director do evento, Joaquín Dosil, un Profesor da Universidade de Vigo, Doutor en Psicoloxía, Máster en psicoloxía do deporte, Máster en Asesoramento e Orientación Familiar, un profesional especialista en saúde mental interesado en estudar e entender o comportamento (ou a conduta, segundo o punto de vista doutras terminoloxías). O seu saber, que é moito, levouno a especializarse en Orientación e asesoramento de altos directivos e xestores de equipos líderes; mellora de rendemento de persoas e equipos; desenvolvemento de negocios de pemes e multinacionais; deseño, xestión e desenvolvemento de políticas empresariais; asesoramento e orientación de imaxe e comunicación de políticos; deseño xestión e desenvolvemento de campañas políticas.
O acto clausurouno o Presidente da Xunta de Galicia, Alberto Núñez Feijoo, achegando, como uno máis, os seus 10 consellos.
Erich Fromm, psicólogo alemán, deixou escrito no seu libro “A arte de amar”, que o mestre aprende dos seus alumnos, o auditorio estimula ao actor, o paciente cura ao seu psicanalista -a condición de que non se traten como obxectos, senón que estean relacionados entre si en forma xenuína e produtiva. Por iso esperamos que Joaquín Dosil poida seguir contribuíndo a curarnos de todo desestimiento ou desentendimiento, o seu exemplo e capacidade de convocatoria son fantásticos. Debémoslle un recoñecemento público.
A luz sen recibo ilumina coa sabedoría, experiencia e bo facer postos en común, iso representa “100 Consellos Santander”.
