Os focos da cultura galega e internacional volven dirixirse este outono á vila de Noia, onde está a coller corpo a nova edición (a número 22) da Mostra de Curtas, que se desenvolve entre este xoves 7 de outubro e o vindeiro martes 12, unha vez máis co Coliseo Noela como centro de operacións (e de proxeccións, todos os días a partir das 20.30 horas). Segundo confirmou Cultura do Concello, xa podemos adquirir as nosas entradas a través da Rede, en Ataquilla.com.
A edición deste ano vén cargada de novidades importantes, máis alá dos esforzos dos organizadores por adaptar o certame (con éxito) ás esixencias sanitarias da loita anti-COVID e garantindo a seguridade do público e, en xeral, de todas as persoas participantes.
Entre as novidades atópase a repercusión que está a acadar o cartel deste ano, obra do artista Rubén Lucas García, que é en si mesmo unha homenaxe dupla: ao audiovisual como fórmula para facernos fortes fronte a calquera tipo de crise, e á vila de Noia (representada con algúns dos seus principais símbolos identificativos) e o seu compromiso irrenunciábel coa creación e a promoción cultural.
Este ano a recibíronse na Mostra de Curtas 1.200 traballos chegados dende diferentes países. Dese total o xurado seleccionou 42, dos que sairán as curtametraxes finalmente galardoadas.
