O Centro Integrado de Atención ás Emerxencias de Galicia (CIAE-112) ven de rexistrar, entre as 18:00 horas de onte e as 07:00 desta mañá, un total de 211 incidencias relacionadas coa meteoroloxía adversa debido á alerta amarela decretada na nosa Comunidade por choivas e vento.
Os concellos costeiros da Pobra do Caramiñal e de Rianxo foron os que rexistraron máis incidencias, un total de 15. Na Pobra, a maioría delas foron por mor de bolsas de auga no lugar do Xobre-Maño, en canto que na localidade rianxeira houbo varios avisos por árbores nos carrís da AG-11 e da estrada comarcal AC-553.
Tamén se rexistraron caídas de árbores noutras estradas da comarca como na DP5605 no Concello de Outes. que obrigou a intervir a unhaotación de bombeiros do Consorcio Provincial Contraincendios e Salvamento da Coruña con base en Boiro. Nas cidades de Santiago de Compostela e da Coruña tamén houbo consecuencias meteorolóxicas, con 9 e 5 incidencias rexistradas, respectivamente.
Por provincias, Pontevedra foi a máis afectada con un total de 99 incidencias, seguida da Coruña con 84. En Lugo e Ourense os efectos foron máis leves, onde se contabilizaron 22 e 6 incidencias respectivamente. En canto ás tipoloxías protagonistas, na meirande parte do territorio galego, a principal foi a de restos de árbores e pólas na estrada (98), seguida por restos de accidentes e obxectos na vía (14) e polo risco de inundacións en vivendas (13).
En canto aos termos municipais desde os que se recibiron máis alertas de incidencias no 112 Galicia, na provincia pontevedresa destaca a cidade de Vigo con 25 incidencias xestionadas, A Estrada con 7 e Pontecaldelas ou Lalín con 4. Así, nas primeiras horas da madrugada, o 112 Galicia recibiu varias chamadas de particulares que informaban de asolagamentos en diversas rúas da cidade olívica coma a Avenida da Gran Vía, Puxeiros ou Ramón Nieto. Xunto a estes avisos, tamén se tivo constancia de diversos obstáculos na VG-20 e na AP-9 ao seu paso pola cidade.
