A Consellería de Sanidade convida á cidadanía para doar sangue e lembra que é necesario obter entre 400 e 500 achegas diarias para posibilitar o labor asistencial dos hospitais galegos.
O conselleiro de Sanidade, Julio García Comesaña, acudiu este xoves pola mañá a doar sangue á unidade móbil da Axencia de Doazón de Órganos e Sangue ( ADOS) que visitou o edificio administrativo da Consellería en San Lázaro. No acto estivo presente a directora de ADOS, Marisa López García.
Sanidade lembra a importancia de doar sangue, posto que “a necesidade de compoñentes sanguíneos por parte dos centros sanitarios galegos supón obter unha cifra de entre 400 e 500 doazóns de sangue diarias” co fin de “posibilidade o adecuado desenvolvemento do intenso labor asistencial dos hospitais da rede sanitaria pública galega”.
Con todo, resalta o “carácter solidario” da cidadanía galega porque, incluso o pasado ano marcado pola pandemia da Covid-19, “non freou a xenerosidade e compromiso” dos habitantes de Galicia porque a Comunidade galega, subliña, “consolidouse como a terceira do Estado en rasa de doazón de sangue”.
Por iso, o departamento sanitario galego agradece a todos os que achegaron a súa “inestimable colaboración e compromiso co solidario xesto da doazón” e lembra que se trata dun “chamamento xeneralizado a todos os doantes”.
