Este xoves 7 de outubro as 18:00 horas, vaise celebrar en Rianxo, ao abeiro do programa de actividades Xoves da Biblioteca, o espectáculo Historias con susto para durmir a gusto. Será unha función para crianzas de de partir de 4 anos comandada polo dúo de narradoras orais Vero Rilo e Sonsoles Penadique, integrantes de Rilo & Penadique.
As entradas son gratuítas, previa reserva de localidades no correo biblioteca@concelloderianxo.gal (preferente) ou no teléfono 667 185 581 ata as 20.00 horas do mércores 6 de outubro.
A reserva será efectiva cando se confirme dende a biblioteca municipal de Rianxo.
En Historias con susto para durmir a gusto, Vero e Penadique enfocarán o seu talento (xeralmente centrado na recuperación de historias tradicionais da nosa terra onde as grandes protagonistas son as mulleres e, tamén, os oficios que estas desempeñaron durante séculos) nas historias de medo. Será, indican, “un especial Samaín para vivir en familia, no que preparamos o ambiente para ofrecer a nosa mirada sobre as historias de sempre, desas de antes de ir durmir…”
