A conselleira de Medio Ambiente, Ángeles Vázquez, estivo este 28 de outubro en Noia para asinar os convenios correspondentes á última convocatoria do Fondo de cooperación de rehabilitación do Instituto Galego da Vivenda e Solo (IGVS), un instrumento de apoio financeiro a concellos de menos de 50.000 habitantes para proxectos de recuperación do patrimonio construído. En virtude disto, o Concello de Noia levará a cabo unha reforma completa do antigo estaleiro de Hermida grazas aos 400.000 € do préstamo que lle concedeu o IGVS este ano. O obxectivo é reconverter as instalacións na nova sede do Club do Mar. As instalacións acolleron o acto de sinatura entre a conselleira e o rexedor, Santiago Freire.
Na cita, a conselleira lembrou as dificultades coas que se atopan decote os Concellos á hora de obter financiamento para “poder levar a cabo proxectos do seu interese”. Por iso, e “co fin de completar o actual Fondo de cooperación de rehabilitación”, a Xunta “porá en marcha o vindeiro ano un segundo programa de préstamos de apoio ás entidades locais”, dixo.
Na listaxe de proxectos apoiados a través da convocatoria actual atópase a reconstrución e ampliación do inmóbel número 93 da rúa de Galicia (a Casa Gran Sol) con fin de adicalo a edificio administrativo e de usos múltiples e biblioteca municipal. Este proxecto será obxecto de 893.736,64 euros.
