Portos comprométese con Outes a arranxar os peiraos flotantes do Freixo co inicio do ano e a parada da campaña marisqueira

Este martes 5 de outubro celebrouse en Santiago unha xuntanza de traballo entre o alcalde de Outes, Manolo González, e a presidenta de Portos de Galicia, Susana Lenguas, para tratar a tardanza no arranxo dos peiraos flotantes (pantaláns) do porto do Freixo. González trasladou á presidenta o malestar dos usuarios das instalacións, en particular dos mariscadores e mariscadoras, “polo mal estado das mesmas”.

Segundo a información transmitida pola presidenta ao rexedor, o atraso nos traballos previstos de arranxo debeuse “a problemas técnico-administrativos previos ao inicio das obras, aínda que estas xa están contratadas dende hai meses”. Dese xeito, engadiu, “aínda que as actuacións xa se poderían comezar, prevese que non comecen até xaneiro, aproveitando a parada da campaña marisqueira”. Dende o Concello agardan “que non se produzan máis demora e que se inicien de vez estas obras tan necesarias”.

Por outra banda o alcalde de Outes fixo chegar á presidenta de Portos a necesidade de acometer melloras estruturais no paseo marítimo do Freixo, en particular nas pasarelas de madeira que comunican a zona dos peiraos flotantes co centro náutico. Nese sentido, González suliñou que o Concello acometerá en breves unha actuación de mantemento nesta infraestrutura, “pero polo que estamos a comprobar, axiña serán necesarias tamén actuacións de carácter máis estrutural na mesma, labores que entendemos que debe asumir Portos”. Finalmente, González e Lenguas tamén trataron a posibilidade de mellora da fachada marítima do Freixo, traballos que irían na dirección de humanizar e reordenar o tráfico nesta zona, que, segundo fixo saber o rexedor, “ten un crecente potencial turístico e de lecer”.

Por último González quixo agradecer a atención amosada por Susana Lenguas ante as cuestións tratadas e agarda que “a colaboración entre Concello e Portos sexa proveitosa para ambas as dúas institucións”.